Шийдвэрийн огноо, дугаар: 2022.01.26, 101/ШШ2022/00389

Шийдвэрийн төлөв: Хүчин төгөлдөр болсон

Тоймын огноо, дугаар: 2023.07.28, №26

            Нэхэмжлэгч А нь ажил гүйцэтгэх гэрээний үүрэгт орон сууцны өмчлөгчөөр тогтоож, өмчлөх эрхийн гэрчилгээг шилжүүлж өгөхийг даалгах нэхэмжлэл хариуцагчид холбогдуулан гаргажээ.           

Хариуцагч М нь уг орон сууцны өмчлөгч бөгөөд үл хөдлөх эд хөрөнгийн өмчлөх эрхийн гэрчилгээтэй тул нэхэмжлэлийг бүхэлд нь эс зөвшөөрөн маргаж, орон сууцыг албадан чөлөөлөх тухай сөрөг нэхэмжлэл гаргасан.

Нэхэмжлэгч нь ажил гүйцэтгэх гэрээний үүрэгт 2 ширхэг орон сууц авахаар тохиролцсон гэж, хариуцагч нь 1 ширхэг орон сууц өгөхөөр тохиролцсон гэж тус тус маргадаг. Улмаар 1 орон сууцыг олгосон үйл баримтын талаар маргаагүй.

Хэргийн үйл баримтаар, нэхэмжлэгч нь хариуцагчийн төлөөлөгчтэй барилгын ажил гүйцэтгэх гэрээ байгуулсан, маргаж буй 2 дахь орон сууц нь нэхэмжлэгч А-н эзэмшилд байгаа, харин өмчлөх эрхийн гэрчилгээ хариуцагч М-н нэр дээр бүртгэгдсэн нь тогтоогдсон.

Ажил гүйцэтгэх гэрээний дагуу 2 ширхэг орон сууцыг ажлын хөлсөнд олгохоор тохиролцсон болох нь хэргийн баримтаар тогтоогдож байгаа боловч хариуцагч М нь түүний төлөөлөгч зөвшөөрөлгүйгээр гэрээ байгуулсан гэж маргасан.

            Гэвч хариуцагч М-н төлөөлөгч нь нэхэмжлэгчтэй ажил гүйцэтгэх гэрээ байгуулах үед хариуцагч М-г төлөөлөх бүрэн эрхтэй байсан нь тогтоогдсон. Мөн барилгын ажлыг төсөвт өртгөөс бага үнээр гүйцэтгэхээр тохиролцсон болон ажил бүрэн гүйцэтгэгдсэн нь хэрэгт байгаа баримтаар тогтоогджээ.

Эдгээр үйл баримтаас шүүх нэхэмжлэгч нь ажлыг бүрэн гүйцэтгэсэн бөгөөд хариуцагч нь ажлын хөлс төлөх үүрэгтэй гэсэн үндэслэлээр нэхэмжлэгчийг орон сууцны өмчлөгчөөр тогтоож, хариуцагчид өмчлөх эрхийн гэрчилгээг шилжүүлэхийг даалгаж, орон сууцыг албадан чөлөөлөх тухай сөрөг нэхэмжлэлийг бүхэлд нь хэрэгсэхгүй болгож шийдвэрлэсэн.

Шийдвэрийг бүтнээр харах цахим холбоос:

https://shuukh.mn/single_case/110423?daterange=2022-01-20%20-%202022-02-01&id=1&court_cat=1&bb=1

Тоймыг бэлтгэсэн:

Баянзүрх дүүргийн Иргэний хэргийн анхан шатны шүүхийн шүүгч Д.Ганболд